2016豐收嘅一年

 

 

2016年呢可以話係好豐收嘅一年，突如其來呢得到一啲我自己都估唔到嘅奬勵同埋禮品，就係我得到咗朋友嘅鼓勵參加啦，多謝Tiffany嘅參加再加上蕭博士嘅提名啦，令到我成功參加咗呢一個選舉得到咗青年領袖呢一個奬項，咁呀喺我今屆裏邊一齊獲奬嘅包括咗有消防員啦，有會計師，又喺大學裏邊成立咗田園計劃啦，亦都有傷殘人士，大家都係抱住一啲領袖嘅特質同埋精神想為社會做更加多有意義嘅服務。

而我今次獲得到呢個奬項呢，係源於我過去累積咗一啲係髮型界嘅義工服務啦，包括去老人院同埋去一啲智障學校裏面，去教家長剪頭髮啦，老人院就係幫一啲老人家剪頭髮啦，幫協康裏面嘅小朋友剪頭髮啦，去做一啲義剪嘅服務，用我嘅專業領域去服務返大眾同社群。

另外呢就我曾經都有喺外國街頭自發性去做義剪去籌募咗一啲錢返嚟，咁再直接捐返去癌症基金比一啲有需要嘅人士，因為我相信佢哋呢一刻有唔舒服身體不適頭髮甩，但佢哋只要堅強勇敢起嚟，佢哋將來⋯⋯都會有美麗嘅髮型，咁我自己都好高興自己能夠捐左一啲善款去香港癌症基金，咁接下來我會有一筆善款捐去香港兒童癌症基金佢哋個戶口裏面，我想可以鼓勵小朋友佢哋只要勇敢啲，佢哋將來都會有靚靚嘅髮型嘅，咁呢個係將來會轉去佢哋戶口上嘅項目。

咁另外就係我都好高興我實行捐頭髮呢個項目嘅時候，都得到我一啲客戶嘅支持，佢哋真係將佢哋改髮型嘅時候剪落嚟嘅頭髮都交俾我去保管，我相信我就可以利用佢哋嘅頭髮send去有需要嘅機構。
咁我都好感恩好恩典自己可以有呢啲咁嘅機會去服務到呢個社區啦，咁我自己都會本住呢個心態繼續向前去進發嘅，多謝各位！